Prishtinë, 22 janar – Defekte që duhet korrektuar janë evidencuar në Kushtetutën e Kosovës, më pak se tre vjet prej hyrjes në fuqi të saj, shkruan Koha Ditore.
Ka konsensus të gjerë midis subjekteve politike se korrektimi duhet nisur menjëherë pasi të fillojë punën legjislatura e ardhshme. Ndërrimet që duhet bërë u referohen sistemit zgjedhor dhe mënyrës së zgjedhjes së presidentit. Të tjera tash për tash nuk përmenden.
Arsim Bajrami, profesor i së drejtës kushtetuese në Universitetin e Prishtinës, i ka thënë gazetës të premten se legjislatura që do të themelohet pas zgjedhjeve të 12 dhjetorit ka kapacitet të plotë legal dhe kushtetues për të shqyrtuar mundësinë e këtyre ndërrimeve.
“Në disa segmente këto ndërrime kushtetuese janë të mundshme, sidomos sa u përket çështjeve që nuk prekin drejtpërdrejt obligimet që i ka vendosur Pakoja e Ahtisaarit”, ka thënë Bajrami, që është edhe një nga hartuesit e Kushtetutës. “Reforma kushtetuese duhet ta ndërrojë definitivisht sistemin zgjedhor dhe duhet ta prekë institucionin e presidentit”.
Kushtetuta ka hyrë në fuqi më 15 qershor të 2008-s, disa muaj pasi Kosova ka shpallur pavarësinë nga Serbia. Ajo është në përputhshmëri me propozimin gjithëpërfshirës për statusin e Kosovës të presidentit Martti Ahtisaari, mbi bazën e të cilit është shpallur pavarësia.
Vjeshtën e vjetme u konstatua nga Gjykata Kushtetuese se presidenti Fatmir Sejdiu po e shkelte Kushtetutën duke mbajtur post partiak dhe atë të kreut të shtetit, situatë kjo që e çoi në dorëheqje Sejdiun. Kjo prodhoi një krizë institucionale, në të cilën ndodhet vendi edhe tash.
Pastaj u organizuan zgjedhjet e parakohshme parlamentare, por ende pa u certifikuar rezultatet ato janë cilësuar si të manipuluara. Për vjedhje votash jo vetëm që kanë akuzuar partitë njëra-tjetrën, por edhe kandidatët kolegët e tyre brenda listës së partisë që i takojnë.