Starton ditën e parë pas arritjes në Milano

Milano, 27 janar – Skuadra Milan ka prezantuar dy blerjet e reja të muajit janar, holandezët Mark Van Bomel dhe Urbi Emanuelson. Ish-futbollisti i Bayernit të Mynihut ka firmosur një kontratë 6 mujore, ndërsa ish-lojtari i Ajaxit, deri në vitin 2014.
Ata të dy debutuan në ndeshjen e Kupës kundër Sampdorias, gjë që sipas Van Bomelit ishte pak e çuditshme. “Nuk isha stërvitur fare me ekipin, pasi të martën isha në Mynih”, tha mesfushori holandez, për të shtuar se falënderon Adriano Galianin dhe trajnerin që i dhanë besimin të laujë menjëherë. “Ndjehem mirë edhe pse sapo kam ardhur”, shtoi më tej Van Bomel.
Ai foli edhe për situatën te Bayerni, duke deklaruar se aty ndryshoi çdo gjë dhe se i duhej të shikonte përpara. Ndërkohë, zëvendës presidenti i Milanit, Adriano Galiani pohoi se për të marrë Van Bomelin u konsultua në fillim me Zllatan Ibrahimoviqin. Për Urbi Emanuelsonin vendimi që të linte Ajaxin dhe t’i bashkohej Milanit nuk ka qenë aspak i vështirë.
“Sigurisht që këtu do më mungojë familja dhe miqtë, por nëse një klub si Milani të kërkon, është e vështirë t’i thuash jo”, deklaroi mesfushori i majtë.