Los Angeles, 10 shkurt - Përsëri telashe me gjyqet për aktoren Lindasay Lohan. Ajo është detyruar të merrte sot pjesë në një tjetër seancë gjyqësore në Los Angeles, për vjedhjen e një varëseje të çmuar, ndërsa turma të tërë gazetarësh e ndiqnin nga pas.
Aktorja u paraqit në seancë e veshur me të bardha, ndërsa deklaroi se ishte e pafajshme.
Ajo akuzohet për vjedhjen e një varëse me vlerë 2 500 dollarë në një dyqan të firmës Venice, në Kaliforni. Gjatë seancës, prokurorët i kanë kërkuar gjykatës një analizë të ADN-së së saj, si dhe gjurmët e gishtave. Nga ana tjetër, avokatët mbrojtës të Lohanit deklarojnë se ajo është krejtësisht e pafajshme, ndërsa kanë hedhur poshtë akuzat si të pabazuara në prova.