De Marnhac : EULEX po kryen punën, Del Ponte të flasë çfarë të dojë

EULEX-i ka të gjitha kompetencat të zhvillojë hetime rreth trafikimit të organeve të pretenduara që kanë ndodhur në Kosovë më 1999, citon KiM radio shefin e EULEX-it, Xavier de Marnhac.

Duke komentuar deklaratën e ish-kryeprokurores të Tribunalit të Hagës se është e gatshme nën patronatin e OKB të vazhdojë e vetme hetimin rreth tregtisë me organe njerëzore, De Marnhac ka thënë se Carla del Ponte mund të deklarojë çfarë të dojë.

“Ne tashmë po punojmë rreth këtij rasti, jemi të gatshëm të zhvillojmë hetimet dhe kemi të gjitha kompetencat që ta bëjmë këtë punë”, ka thënë De Marnhac, transmetoi Koha.

Shefi i EULEX-it ka paralajmëruar vizitë në Beograd dhe, sipas KiM radio, ai ka thënë se atje do të bisedojë për çështjen e gjyqtarëve.

Këto komente De Marnhac i bëri të martë, ku së bashku me ministrisë së Punëve të Brendshme, Bajram Rexhepi vizituan pikëkalimin kufitar ndërmjet Kosovës e Serbisë, Merdarin dhe biseduan me nëpunësit e EULEX-it dhe të Policisë së Kosovës që punojnë në këtë vendkalim.