AFORIZMA PËR MENDIMIN DHE FJALËN

- Thuhet se për mendime të mëdha duhet të jesh edhe hero edhe idealist, e unë them: Për mendimin pozitiv duhet të jesh vetëm NJERI!
- Mendimet më të thella janë aq të thjeshta sa secili lexues do të mendojë se këto janë mendimet e tij!
- Mendimet rrinë në secilin njeri, si ajka në çdo pikë të qumështit!
- …mendimi i mirë, herë-herë, është sikur brumi: duhet ngjeshur mirë e mirë, që të shndërrohet në mendim jetëgjatë!
- Mendimet shpesh janë sikur era: shuajnë zjarrin e vogël, por ndezin edhe më shumë zjarrin e madh!
- Mendimet e këndshme sjellin kthesa!
- Mendimet e fuqishme, nëpërmjet njeriut, sundojnë botën!
- Nuk ka asgjë në botë që të çarmatosë me shumë e me fort se sa mendimi që përmban mirësi!
- Mendimi pozitiv është mbret i gjithë botës, mendimi negativ është mbret vetëm i budallenjve!
- Ortaku ynë tha: Mendimet janë si diamanti, aq sa është zor të gjenden, aq është zor të përpunohen!
- Të gjitha qeveritë në botë mbledhin tatime e bëjnë investime, por asnjë qeveri në botë nuk mund të mbjellë gëzime në zemrat e njerëzve si mendimi pozitiv!
- Thuhet: Njerëzit vdesin, përmendoret rrënohen, vetëm mendimet që ndërtojnë jetën e brezave jetojnë deri në amshim!

- Mendimi pozitiv është çelës që i hap të gjitha dyert e thesarit të jetës!
- Mendimi, thonë të urtit, është vetëm një vetëtimë, por ajo vetëtimë është gjithçka!
- Të gjitha që i kemi dhe gjithçka që jemi, është vetëm pasojë e mendimeve tona!
- Mësuesi tha: Mendimet janë fuqi që e vënë në lëvizje edhe qiellin, edhe tokën!
- Në qoftë se vetëdijesohemi për fuqinë e mendimeve, nuk do të kemi nevojë të akuzojmë askënd për dështimet tona!
- Është e njohur se mendimi krijues është vlera e parë e gjinisë njerëzore: të krijosh do të thotë të jetosh edhe shumë kohë përtej vdekjes!
- Në qoftë se, vërtet, vetëdijesohemi për fuqinë e mendimeve tona, do ta kemi vetëm një nevojë: të dashurit tanë t’i ftojmë në festat e gëzimeve!
- Nënvizoje me vijë të trashë: Asnjëherë mos i beso asnjë mendimi që lind në kokën tënde, në qoftë se ai mendim nuk të sjell gëzim në zemër!
- Mësuesi tha: Jam betuar se do ta dëgjoj vetëm njeriun që fjalën e përdor për të thënë një MENDIM dhe mendimin e përdor për të thënë TË VËRTETËN!

- Plaku tha: Mendja e fuqishme që ndjek qëllime praktike, është mendja më e mirë në botë!
- Mendimi pozitiv është sikur dielli: gjithë natyrës i jep dritë e jetë dhe nuk krijon zhurmë!
- Mendimi pozitiv është sikur dielli: asgjë nuk rëndon, asgjë nuk lëndon dhe asgjë nuk rrënon!
- Mendimi pozitiv është begati e pafund: mund të marrin të gjithë sa të duan dhe, prapë, kurrë fundi s’i shihet!
- Mendimi pozitiv depërton nëpër tërë qenien e njeriut, sjell dritë, ngrohtësi, energji dhe kurrë nuk thyen, as nuk lëndon gjë!
- Mendimi pozitiv është barra më e lehtë në jetë, askush deri më sot nuk ka ndier lodhje prej tij!
- Mendimi pozitiv nuk shkakton ngopje, natë e ditë mbill mendime pozitive në qenien tënde dhe, prapë, do të kesh nevojë për mbjellje të reja!
- Mendimi pozitiv është fillimi i udhëtimit drejt QETËSISË!
- Mendimi pozitiv është ama e jetës së lumtur!

Aforizma për fjalën

- Fjala e saktë është zile alarmi, që e zgjon nga gjumi mjekun më të mirë në botë, i cili gjendet në trupin e njeriut! (Daut Demaku)
- Fjalët dhe punët e njerëzve të mëdhenj nuk janë sipas vendit e kohës së tyre, ato mund t'i përshtaten çdo kohe dhe çdo vendi! (Sami Frashëri)
- Është lehtë të flasësh kur ke ç'të thuash, mirëpo vështirë është ç'të thuash kur duhet të flasësh! (Elioti)
- Me sytë e bukur, shiko vetëm për të mirën e të tjerëve. Me buzët e bukura fol vetëm fjalë mirësie. Dhe për bukurinë e lëvizjeve të trupit, ec duke e ditur se kurrë nuk je vetëm! (Audrey Hepburn)
- Tri gjëra kurrë nuk mund të kthehen mbrapsht: fjala e thënë, shigjeta e lëshuar dhe koha e kaluar! (Thënie angleze)
- Fjala është grua shtatzënë që lind viganë! (Miroslav Kërlezha)
- Fjala e saktë i hap dyert e barnatores më komplete në botë, që gjendet brenda trupit të njeriut! (Daut Demaku)
- Rrallëherë pendohemi për fjalët e pakta, e shpeshherë është fjalët e shumta. Kjo është një e vërtetë e vjetër, që e dinë të gjithë, veçse askush nuk i përmbahet! (La Bryeri)
- Fjala duhet të peshohet sipas meritës së fjalës, e jo sipas meritës së shqiptuesit! (Veton Surroi)
- Njeriu gjithnjë ka kohë për të shtuar një fjalë, kurse kurrë nuk ka kohë për ta tërhequr mbrapsht!
- Iu druaj atyre fjalëve të mëdha që a bëjnë neve kaq të palumtur! (James Joyce)
- Fjala është thikë me dy tehe, ajo edhe mund ta lëndojë shpirtin, por edhe mund ta shërojë atë! (Daut Demaku)

- Unë vërtet i përkas një sistemi ku fjalët janë në gjendje ta tundin krejt strukturën e një qeverie, ku fjalët mund të tregohen më të fuqishme se dhjetë divizione ushtarake! (Vaclav Haval)
- Mos e përdor fjalën e huaj "ideal". Ne e kemi fjalën e hatashme burimore "gënjeshtër"! (Henrik Ibsen)
- Fjala është e dobishme vetëm kur është e matur dhe kur thuhet në kohë dhe në vend të duhur!
- Bukuria e njeriut përbëhet nga bukuria e fjalës që flet! (Sami Frashëri)
- Madje as një jetë e lumtur nuk mund të jetë pa një përmasë errësire, dhe fjala lumturi do ta humbte kuptimin e saj nëse nuk do të ishte e baraspeshuar me trishtimin! (Carl Jun)
- Fjalët e mia në mendjen e saj: gurë të ftoftë e të shndritshëm duke u fundosur në një moçal! (James Joyce)
- Dy fjalë janë të çuditshme: fjalën e urtë që e nxjerr budallai, pranojeni atë, dhe fjalën e dobët që e shqipton i urti, faleni atë!
- Fjalët e urta janë zbukurim i të folurit! (Thënie persiane)
- Pleqëria është 60 për qind bindje: nëse e do rinimin, ndryshoje këtë bindje me fuqinë e fjalës! (Daut Demaku)
- Një fjalë na çliron nga të gjitha barrët dhe dhimbjet e jetës: ajo fjalë është "dashuria"! (Sofokliu)
- Biseduesi duhet të ketë kujdes çka flet, në çfarë vendi flet, dhe në çfarë mënyrë flet! (Ciceroni)
- Veprat flasin më shumë se sa fjalët! (Thënie angleze)
- Një punë e bukur është më e dobishme se sa një mijë fjalë të bukura! (Sami Frashëri)
- Të flasësh për fjalën është më e vështirë se sa të shkruash për heshtjen! (Heidegger)
- Para se fjalët të mbarojnë me pikë, le të fillojnë nga pika! Pika është vetëm pikë. Por, pa pikën fjalët e humbasin kuptimin! (Fatmir Muja)
- Thuaje fjalën që duhet, ose heshtë!