Prokuroria dyshon se armët me të cilat janë vrarë tre demonstruesit nuk i janë servirur nga Garda e Republikës. “Nga verifikimi i armëve deri më tani, asnjëra nuk ka rezultuar që ka qëlluar viktimat”, thanë burimet nga grupoi hetimor, duke shtuar se janë krahasuar predhat dhe gëzhojat. Akuza thotë se ka dyshime se armët e marra në Gardë nuk kanë qëlluar ndaj tyre, ndërsa saktëson se po heton edhe për mundësinë e zhdukjes dhe fshehjes së tyre. Një tjetër veprim i grupit hetimor për masakrën e 21 janarit ka qenë sekuestrimi i armëve të Gardës së Republikës, për t’i krahasuar më pas me gëzhojat në vendngjarje dhe predhat e gjetura te trupat e viktimave e për të dalë në konkluzionin nëse vrasjet kanë ndodhur nga punonjësit e Gardës. Garda i ka servirur vetëm 52 armë grupit hetimor. Armët janë të llojit “Kallashnikov” e “PMSH”, si dhe të tjera që përdoren nga gardistët. “Armët e tjera nuk janë dhënë me arsyetimin se Garda mbetet pa to, kur aktualisht është në gatishmëri”, thanë burimet nga Prokuroria e Tiranës.