Katër ditë nuk është ditur asgjë për fatin e Sadri Hajrizit, (1947), nga Uglari i Gjilanit. Mëngjesin e së enjtes ai është gjetur në pusin e shtëpisë së tij në lagjen “Dardania” në Gjilan, i vrarë nga vëllai i viktimës, Idriz Hajrizi, (1966), i cili është arrestuar.
Para hetuesve policorë i dyshimti e ka pranuar se vëllanë e kishte qëlluar me sëpatë në kokë dhe se atë pastaj e kishte hedhur në pus (bunar). Ai e ka treguar edhe vendin ku i kishte fshehur rrobat e gjakosura afër lumit Mirusha, e të cilat janë marrë nga policia.
Rastin në polici e kishte raportuar një nip i viktimës, i cili kishte kërkuar asistimin e policisë për të hapur derën e shtëpisë së viktimës, i cili nuk ishte parë prej ditës së hënë. Me urdhër të prokurorit, policët pasi kanë thyer dyert e shtëpisë, janë futur brenda, por nuk e kanë gjetur viktimën.
Duke e vazhduar kërkimin jashtë, pasi në shtëpi kishin vërejtur shenja gjaku, kanë arritur që viktimën ta gjejnë në pusin e shtëpisë, i cili ka qenë i mbuluar mirë me kapak dhe i rrafshuar me tokë. Viktima është nxjerrë nga pusi me ndihmën e zjarrfikësve dhe kufoma është dërguar për obduksion në Institutin e Mjekësisë Ligjore në Prishtinë.
Në prokurorinë e Gjilanit, prokurori Fahri Nuhiu, ka thënë se viktima, e cila është nxjerrë nga pusi të enjten rreth orës 02:00 të mëngjesit, ka pasur tri plagë prerëse në kokë, si dhe një hematomë pas veshit.
Në vendngjarje është kuptuar se viktima nuk kishte raporte të mira me vëllanë, që banon në një lagje tjetër të qytetit, për çka prokurori ka dhënë urdhër që të bastiset shtëpia e tij. Nën shtrat të vëllait është gjetur një thikë e madhe që, siç u vërtetua, ishte nga kompleti i thikave të kuzhinës së viktimës.
I ndjeri Sadri Hajrizi jetonte vetëm në shtëpi, ndërsa familjarët e tij ndodhen jashtë shtetit. Të dyshimtit i është caktuar masa e paraburgimit, ndërkaq pritet që hetimet të zbardhin se cilat ishin motivet e vërteta të kësaj ngjarjeje të rëndë./zeri.info