Nga sot ANP mori emrin “Adem Jashari”

Prishtinë, 28 nëntor – Aeroporti Ndërkombëtar i Prishtinës nga sot ka marrë emrin e komandantit legjendar të UÇK-së Adem Jashari. Vendimi për këtë emërtim ishte marrë kohë më parë nga Qeveria në dorëheqje e Kosovës, kur u vendos që edhe autostrada Vërmicë – Merdar të pagëzohet me emrin e Ibrahim Rugovës.
Në ceremoninë e emërimit të ANP-së me emrin Adem Jashari, fillimisht drejtori, Agron Mustafa, foli për të arriturat dhe për nderin që i bëhet kështu këtij aeroporti. Pastaj, presidenti në detyrë i Kosovës, Jakup Krasniqi rikujtoi se 28 Nëntori është festa më e rëndësishme kombëtare shqiptare, meqë me këtë datë lidhet krijimi i shtetit shqiptar, liria dhe nderi kombëtar, se në këtë ditë, më 1955 u lind personaliteti që i priu luftës çlirimtare të Kosovës, komandanti legjendar i UÇK-së Adem Jashari. Emri i Adem Jasharit do t’i shoqërojë udhëtarët që fluturojnë ose aterrojnë nga e në këtë aeroport nga qielli i Kosovës së lirë, tha Krasniqi, duke krahasuar krenarinë që duhet të ndjejnë ashtu si ata të Aeroportit të Parisit, që mban emrin e Sharl De Golit.
Kryeministri në dorëheqje Hashim Thaçi vlerësoi vendimin e Qeverisë që drejton si shumë të goditur dhe uroi që ky aeroport ta mbajë me nder, kurse Sabit Brokaj nga Shqipëria, emri i të cilit është i lidhur me UÇK-në e komandantin e saj Adem Jashari, e quajti nder për këtë aeroport emrin që mori.
Në emër të familjes Jashari u falënderua Rifat Jashari.