Gjilan, 12 dhjetor - Partia Demokratike e Kosovës (PDK), Dega në Gjilan, ka reaguar ndaj komunikatës së Vetëvendosjes, sipas së cilës aktivistët e PDK-së kanë dalë para shkollës "Arbëria" në Gjilan dhe u kanë ofruar votuesve nga 20 euro për t’i blerë votat e tyre. Po ashtu, sipas Vetëvendosjes, në fshatin Velekincë të Gjilanit janë shpërndarë fletëvotime të plotësuara jashtë qendrës së votimit nga ana e Abedin Dalipit.
Shefi i Shtabit Zgjedhor të PDK-së në Gjilan, Izmi Zeka, tha për KD se pohimet e thëna në komunikatën e Vetëvendosjes “janë të pavërteta, spekulime dhe tentime për ta arsyetuar humbjen para qytetarëve që i ka mashtruar Vetëvendosja”.
Sipas Zekës, procesi zgjedhor në Gjilan ka qenë ndër më të mirët, pa asnjë incident dhe plotësisht brenda standardeve të shteteve më të përparuara demokratike. Zeka ka nënvizuar se votat fitohen në kuti votimi dhe në proces të rregullt e jo me spekulime dhe të pavërteta. "Vetëvendosja duhet të përgatitet e ta arsyetojë humbjen para atyre që u ka premtuar me mungesën e programit dhe jo me spekulime e mekanizma tjerë mbrojtës”, tha Zeka.