Hoxhaj paralajmëron të fuqishmit: Rrezik nga ndarja!

Prishtinë, 4 gusht - Ministri i Punëve të Jashtme të Kosovës, Enver Hoxhaj ka bërë një paralajmërim për rrezikun që i kanoset vendit, tendenca e ndarjes së shtetit. Në një intervistë për agjencinë britanike të lajmeve Reuters, Hoxhaj ka thënë se nëse nuk ka reagim dhe presion ndërkombëtar ndaj Serbisë, ndarja edhe mund të ndodhë.“Rreziku është shumë real dhe kjo mund të ndodhë. Kjo varet nga reagimi i fuqive të mëdha lidhur me situatën në veri. Varet nga ajo se si NATO-ja do të mbështesë prezencën e KFOR-it në pjesën veriore”, ka thënë Hoxhaj.

Ai ka shtuar se kjo varet gjithashtu nga ajo se sa do të ketë presion diplomatik ndërkombëtar mbi Beogradin. “Nëse nuk ka presion, realiteti është se ndarja e Kosovës do të ndodhë”.

Por, megjithëkëtë, si transmeton Indeksonline, Hoxhaj ka shtuar se ndarja eventuale e Kosovës do të hape të ashtuquajturën Kuti e Pandorës, me mundësinë e përhapjes së dhunës në shkallë të paimagjinueshme në krejt rajonin.