Festa e Flamurit, krenari për shqiptarët

Dita e Pavarësisë së Shqipërisë, Festa e Flamurit, është ngjarje e rrënjosur thellë në kujtesën historike të kombit shqiptar, që ngjall ndjenjat e krenarisë, frymëzimit dhe rrit vetëdijen politike, kulturore dhe demokratike tek shqiptarët kudo që jetojnë, thuhet në urimin e kryeministrit të Kosovës, Hashim Thaçi dërguar homologut të tij nga Shqipëria, Sali Berisha me rastin e 28 Nëntorit, Ditës së Flamurit.

Kryeministri Thaçi ka thënë se në 99-vjetorin e Pavarësisë, Republika e Shqipërisë hyn si shtet i konsoliduar, anëtar i NATO-s, me të drejtën e liberalizimit të vizave si dhe me një infrastrukturë që e çon të sigurt drejt integrimit në Bashkimin Evropian.

“Edhe një vit mbushet një shekull nga akti më i rëndësishëm i historisë së kombit shqiptar, shpallja e Pavarësisë së Shqipërisë, më 28 nëntor 1912, duke kurorëzuar përpjekjet e pareshtura të popullit tonë për liri dhe mëvetësi. Dita e Pavarësisë së Shqipërisë, Festa e Flamurit, është ngjarje e rrënjosur thellë në kujtesën historike të kombit shqiptar, që ngjall ndjenjat e krenarisë, frymëzimit dhe rrit vetëdijen politike, kulturore dhe demokratike tek shqiptarët kudo që jetojnë”, thuhet në urim.

Duke përkujtuar se Festa e Flamurit ishte një ndër ngjarjet që ka frymëzuar breza të tërë në përpjekjet për liri dhe çlirim të Kosovës, luftën e lavdishme të UÇK-së arritjen e lirisë dhe shpalljen e pavarësisë së Kosovës më 18 shkurt 2008, kryeministri Thaçi ka thënë se Kosova është mirënjohëse për kontributin e Shqipërisë, në të gjitha periudhat historike, duke iu gëzuar të arriturave të shtetit shqiptar, mirëqenies ekonomike të qytetarëve të saj, afirmimit dhe përparimit të përgjithshëm në të gjitha fushat e jetës.

“Shqipëria, një shtet me perspektivë të zhvillimit ekonomik, është duke luajtur rol të rëndësishëm në rajon, si shembull i fqinjësisë së mirë, paqes, stabilitetit, partneritetit dhe bashkëpunimit. Kam nderin dhe kënaqësinë që në emër të Qeverisë së Republikës së Kosovës dhe në emër të të gjithë qytetarëve të saj, t’ju përgëzoj në 99 vjetorin e Ditës së Flamurit, me urimin e thellimit të fitoreve dhe sukseseve të popullit shqiptar”, përfundon urimi i kryeministrit Thaçi.

e me te vertet esht nje krenari e madhe;