Tiranë, 22 janar - Policia e Tiranës ka bërë publike sot të dhënat mbi demonstratën e djeshme, ku u shënua viktima dhe të plagosur, si dhe gurë pa fund mbi policinë.
Kjo drejtori sqaroi sot se policia kishte marrë të gjitha masat, por demonstruesit ushtruan dhunë ndaj uniformave blu, çka i ka detyruar këta të fundit të reagojnë.
“Drejtoria e policisë së Tiranës, bazuar në kërkesën e PS, mori të gjitha masat e nevojshme për sigurimin e qetësisë publike. Pas grumbullimit para kryeministrisë, grupe protestuesish, të nxitur nga organizatorët e protestës, sulmuan me gurë policinë. Ata përdorën bomba molotov, mjete gazsjellëse dhe gurë. Ndërsa policia ruajti gjakftohtësinë”, tha zëdhënësja e policisë, Alma Katragjini.
Ajo bëri të ditur edhe të plagosurit, si dhe hetimet që po zhvillohen në këtë drejtim. “Tre qytetarë gjetën vdekjen dhe 50 agjentë u plagosën. Për hetimin e të gjitha çështjeve është ngritur një grup nga prokuroria e Tiranës, që do të zbardhë vrasjen e tre shtetasve në demonstratë. Ndërkohë, për konsumimin e veprave penale si “kundërshtim i forcave të rendit” dhe “rrezikim i sigurisë publike” janë arrestuar 113 persona”, ka shtuar Katragjini.