Bihaq, 24 janar - Në vendkalimin kufitar midis Bosnjës e Hercegovinës dhe Kroacisë, Izaçiqi afër Bihaqit, në anën kroate të kufirit, është gjetur trupi i ngrirë i një femre të re nga Peja. Ajo kishte tentuar ilegalisht të kalojë kufirin, raportojnë mediat boshnjake dhe ato kroate. Ajo është gjetur bashkë me fëmijën e saj dyvjeçar, i cili raportohet të jetë në gjendje të mirë. Në anën tjetër të kufirit atë po e priste i vëllai i saj.
Trupi i pajetë i të ndjerës është gjetur nga policia kufitare kroate.
Mediat nuk japin hollësi e as identitetin e plotë të viktimës.
Në bazë të deklaratës së të vëllait të viktimës, mediat boshnjake njoftojnë se janë arrestuar dy meshkuj dhe një femër nga kantoni i Unës, të dyshimtë se kanë qenë të përzier në këtë rast dhe në raste të tjera të kalimit ilegal në kufirit boshnjako-kroat.