Trupi i pajetë i 40-vjeçarit S. Bazaj nga Sllatina e Fushë Kosovës, të martën është nxjerrë nga Shpella e Zgatarit, në komunën e Sharrit. E tëra kjo është arritur, pas një aksioni të përbashkët të Policisë së Kosovës, Njësitit të Kërkim-Shpëtimit të FSK-së dhe organeve të ndjekjes, të cilët ishin vënë në kërkim për zbardhjen e këtij rasti, duke ndaluar tre persona të dyshuar, prej tyre dy nga Mitrovica, ndërsa i treti nga komuna e Sharrit.
Mësohet se viktima është S. Bazaj, 40 vjeç, nga fshati Sllatinë, komuna e Fushë Kosovës, i cili dyshohet se është hedhur në shpellë nga tre personat e dyshuar për kryerjen e kësaj vepre makabre.
Zbardhja e këtij krimi të rëndë është mundësuar në saje të bashkëpunimit të tri njësiteve hetuese nga rajonet e Prizrenit, Mitrovicës dhe Prishtinës, ndërkaq burimet e gazetës bëjnë të ditur se i arrestuari nga komuna e Sharrit është R.F. nga fshati Kapre i Opojës.
Mësohet, po ashtu se viktima ishte zhdukur më 8 nëntor, ndërsa Njësiti rajonal i Hetimeve në Prizren ishte njoftuar për këtë rast dhjetë ditë më vonë kur, me një aksion të përbashkët me Njësitin për Kërkim – Shpëtim të Forcave të Sigurisë së Kosovës, kanë kryer me sukses aksionin rreth nxjerrjes së trupit të pajetë, nga shpella mjaft e papërshtatshme dhe e thellë rreth 80 metra.
Hetimet e deritashme ende nuk kanë qartësuar motivin e këtij krimi, si dhe faktin nëse viktima është hedhur e gjallë në këtë shpellë, apo më parë është vrarë.
Komandanti i Stacionit policor në Sharr, Gëzim Zogaj, ka theksuar për “Zërin” se i gjithë aksioni është kryer me sukses dhe e veçanta e tërë kësaj ishte fakti se në të u përfshinë kryekëput forcat vendore nga të gjitha strukturat.
“E tëra që dihet tani për tani është se janë arrestuar tre persona të dyshuar”, ka pohuar shkurt Zogaj./ zeri.info