Policia e Murmanskut, në veriperëndim të Rusisë, ka arrestuar një të ri rus, për të cilin dyshohet se ka vrarë dhe ka hëngër një burrë, të cilin e kishte takuar në një faqe interneti të homoseksualëve, ka njoftuar Komiteti hetues rajonal.
I dyshuari, 21-vjeç, ka treguar se me viktimën e tij, një 32-vjeç, është njohur në një faqe elektronike të takimeve të homoseksualëve. Sipas Komitetit hetues, më 19 gusht, ai e kishte ftuar në shtëpinë e tij, e kishte therur dhe e kishte copëtuar për ta ngrënë.
Për plot një javë, i dyshuari ka përgatitur gjithfarë ushqimi me mishin e viktimës së tij. “Arsyeja e vetme e përmendur për vrasjen ishte dëshira e tij për ta shijuar mishin e njeriut”, ka theksuar Fiodor Bliudionov, shef i Komitetit hetues.
Kanibali e ka kërkuar viktimën në qarqet homoseksuale sepse «aty ka njerëz të rezervuar, të cilët nuk kanë dëshirë t’i bëjnë publike orientimet e tyre», ka shpjeguar Bliudionov, duke theksuar se ai mund të ketë ftuar në shtëpi edhe njerëz të tjerë. /AFP/zëri/