Sharr, helmohen nxënësit shqiptarë nga produktet serbe

Në fshatin Bresanë, të komunës së Sharrit, disa nxënës të shkollës fillore “28 nëntori”, janë helmuar nga konsumimi i produkteve serbe.

Njoftimin për helmimin e nxënësve e ka lëshuar Qendra e Lëvizjes Vetëvendosje në Sharr.

“Rasti ka ndodhur gjatë festimit të ditëlindjes së nxënësit Mukadin Fejzullahu, kur ai së bashku me shokët kanë konsumuar ëmbëlsira të llojit “Tako” të prodhuara në Serbi. Më pas, nxënësit kanë filluar të ankohen për dhimbje të forta të barkut dhe vjellje e vazhdueshme”, thuhet në njoftimin e Vetëvendosjes.

Drejtori i shkollës dhe kujdestari i klasës i kanë shoqëruar nxënësit menjëherë për në Spitalin Rajonal të Prizrenit. Sipas tyre, shkas i helmimit ka qenë ky lloj i ëmbëlsirës, i cili edhe pse nuk kishte afat të skaduar, kundërmonte një erë të keqe.

Doktoresha Lebibe Hasani nga Instituti për Shëndet Publik, ka pohuar se janë marrë mostra nga të vjellat e nxënësve dhe rezultatet e analizës përfundimtare të rastit konkret do te publikohen te hënën.

“Përveç dëmit ekonomik që po i sjell vendit konsumimi i produkteve serbe të cilin ne do të vazhdojmë ta denoncojmë, lejimi i qarkullimit të tyre në treg nënkupton pranimin e vetëdijshëm të rrezikut real të cenimit të shëndetit publik, ashtu siç ndodhi me fëmijët në Bresanë të Sharrit”, thekson Vetëvendosje, e cila gjithashtu kërkon nga organet e rendit nisjen e menjëhershme të hetimeve për rastin konkret si dhe fillimin e ndjekjes penale ndaj importuesve vendor të këtyre produkteve. /zëri/