Pjesëtarët e KFOR-it amerikan të martën herët në mëngjes kanë filluar një aksion të ri të heqjes së barrikadave në vendkalimin kufitar Jarinjë dhe me këtë rast kanë arrestuar disa persona.
Kështu ka njoftuar agjencia serbe e lajmeve, “Tanjug”, ndërkaq sipas agjencisë së lajmeve “Beta”, thuhet se ushtarët kanë përdorur gaz lotsjellës për t’i larguar barrikaduesit, e më pas edhe i kanë lidhur ata.
Gjatë këtij aksioni, KFOR-i, sipas medieve serbe, ka arrestuar pesë persona që kujdestaronin në barrikada.
Ndryshe, bëhet e ditur se KFOR-i, që nga mëngjesi i sotëm, po arreston të gjithë personat që shfrytëzojnë rrugët alternative.
Ndër të arrestuarit është edhe i ashtuquajturi shef i mbrojtjes civile në Leposaviq, Radomir Bogdanovic, ndërkaq të arrestuarit e tjerë janë liruar më pas.
Mediet raportojnë se serbët, megjithatë, në afërsi të Jarinjës kanë ngritur një barrikadë të re. /Telegrafi/