Mitrovicë, 11 prill - Një përleshje masive ndërmjet lojtarëve të Trepçës dhe Bambit ka ndodhur mbrëmjen e sotme në Palestrën e Sporteve në Mitrovicë. Incidentit i ka paraprirë një gjest provokues i Jugosllav Dashiqit basketbollist i Bambit, i cili para se të niste dueli, ka provokuar shikuesit e pranishëm në palestrën “Minatori”. Këta të fundit kanë reaguar duke sharë lojtarët e Bambit. Me këtë rast, drejtuesit e Bambit kanë kërkuar nga policia që të largohen tifozët duke kërcënuar me mos nisje të lojës. Kamera e Kohavisionit në sallë është penguar nga tifozët e pranishëm për të xhiruar pamjet e këtij incidenti. Ndërkohë policia e Kosovës ka konfirmuar rastin por nuk ka dhënë detaje të tjera.