Në Qyshk të Pejës, tre të vdekur e dy të lënduar në trafik

Pejë, 13 Gusht– Një aksident tragjik trafiku ka ndodhur sot pasdite në fshatin Qyshk të Pejës. Tre persona kanë vdekur dhe 2 të tjerë janë lënduar në aksidentin fatal të trafikut në magjistralen Pejë-Prishtinë, konkretisht në fshatin Qyshk. Dy të lënduarit janë dërguar me urgjencë në Qendrën Klinike Universitare. Sipas hetimeve preliminare të Policisë së Kosovës, dyshohet se shkaktar i aksidentit ka qenë shpejtësia e madhe e dy automjeteve të cilat janë përplasur njëra me tjetrën.

Lajmin e ka konfirmuar edhe policia e Kosovës, e cila ka paralajmëruar të jap së shpejti më shumë hollësi për këtë aksident fatal.

Pejë, 13 Gusht - Katër persona kanë vdekur si pasojë e një aksidenti që ka ndodhur rreth orës 18.00 të ditës së shtunë në rrugën Prishtinë-Pejë, në hyrje të Pejës.

Aksidenti ka ndodhur si pasojë e shpejtësisë tejet të madhe të dy veturave të përfshira në aksident, ku dy pasagjerë kishin ndërruar jetë menjëherë, ndërsa dy të tjerë janë dërguar në gjendje kritike, të cilët pas pak kohe kanë ndërruar jetë.

Zëvendëskomandanti i komunikacionit në policinë e Pejës, Agim Pantina i cili gjendej në vendin e ngjarjes, tha se rezultat i aksidentit është shpejtësia e madhe.

"Pas marrjes së informatës në vend ngjarje kanë dalë zjarrfikësit, policia e komunikacionit rrugor patrulla e njësisë speciale, po shihet se dëmet e këtij aksidenti janë shumë të mëdha", tha Pantina.

Pantina porositi të gjithë ngasësit që të kenë kujdes të madh në ngasje. "Është një fluks i madh i bashkatdhetarëve, numër i madh i automjeteve dhe ngasja po bëhet në mënyrë të pakontrolluar, andaj bëj apel tek qytetarët që të kenë kujdes të madh gjatë ngasjes", porositi Pantina.