Instituti për Studime Ndërkombëtare ka publikuar dje një sondazh në lidhje me zgjedhjet vendore të datës 8 Maj për pritshmërinë e votuesve. Drejtuesi i Institutit, Albert Rakipi, është shprehur se qëllimi primar i sondazhit, ku janë pyetur 1250 persona në 10 rrethe të vendit, është perceptimi mbi zgjedhjet lokale. Pyetjes nëse besojnë që zgjedhjet do të jenë të drejta dhe të lira 34.7% i janë përgjigjur po, 28.3 mendojnë se zgjedhjet nuk do të jenë të drejta e të lira, ndërsa 37 për qind nuk mund të shprehen saktësisht. Ky sondazh zbulon një fakt interesant, se cilat janë arsyet përse votohet një kandidat ku në plan të parë dalin cilësitë e kandidatit dhe jo programi.